بالصور: الاتحاد اللبناني للتزلج والبياتلون وزّع جوائزه على ابطال وبطلات عام 2023
![](https://cedarnews.net/wp-content/uploads/2023/10/1-ski-600x400.jpg)
وزّع الاتحاد اللبناني للتزلج على الثلج والبياتلون الكؤوس والجوائز على الفائزين والفائزات ببطولات موسم 2022-2023 خلال الحفل السنوي الذي أقيم في احدى قاعات كازينو لبنان.وحضر رئيس الاتحاد فريدي كيروز وجميع أعضاء اللجنة الادارية وقائد مدرسة التزلج في الجيش اللبناني العميد الركن سميح خليل ومسؤولو محطات التزلج ورؤساء واعضاء الاندية وممثلو الشركات الراعية واللاعبون واللاعبات وذووهم.
مجاعص
النشيد الوطني اللبناني افتتاحاً فكلمة عريف الحفل الاعلامي خالد مجاعص رحّب فيها بالحاضرين وقال”باسم رئيس وأعضاء اتحاد التزلج والبياتلون برحب فيكن بحفل توزيع الكؤوس والجوائز على ابطال وبطلات موسم 2022-2023 وهوي الحفل السنوي التقليدي يللي بيجمع عيلة لعبة التزلج بأجواء اخوية وعائلية .بداية بحب وجّه التهنئة للاتحاد بانضمام رياضة البياتلون رسمياً الى الاتحاد اللبناني للتزلج وبتمنى التوفيق بتطوير هاللعبة .وكلكن بتعرفو انو اتحاد التزلج من الاتحادات الفاعلة والنشيطة ويللي بتقوم بواجباتا على أكمل وجه من رعاية وتطوير اللعبة وصقل الجيل الناشئ وتنظيم البطولات والمشاركة بالدورات والمسابقات والبطولات الخارجية ببعثات من كافة الفئات العمرية مع مواكبة اعلامية شاملة.
ومن اسباب نجاح هالاتحاد عمل اللجنة الادارية بيد وحدة بهدف رعاية رياضة التزلج وهيي اللعبة الشتوية الوحيدة ضمن الاتحادات الأولمبية ال28 الموجودة حالياً بلبنان .فالتجانس التام موجود ضمن كافة اعضاء اللجنة الادارية يللي هنّي على تواصل مع عيلة اللعبة من اداريين ومدربين ولاعبين من دون ما انسى التنسيق الدايم والتواصل المستمر مع مسؤولي محطات التزلج الشريك الأساسي .
رح كون صريح:لم اسمع ابداً عن خلاف داخلي ضمن اللجنة الادارية.فكل عضو بيقوم بواجباتو على أكمل وجه والمداولات ديموقراطية لاتحاد من الاتحادات القليلة يللي بتغيب عنو المناكفات والخلافات وعلى علاقة وطيدة مع الجميع محلياً وخارجياً ودورو فاعل بالاتحادات القارية والدولية وهيدا من اسباب نجاحو.وبدي شير انو الاتحاد أبعد السياسة عنّو وما دخل بالزواريب المناطقية الضيقة فهوي صامد كتلة موحدة .ولازم عيلة التزلج تفتخر بالاتحاد برئاسة الاستاذ فريدي كيروز يللي عم بقود اللعبة من تألق لتألق مع التمني الدائم بنجاح الاتحاد محلياً ودولياً ومواصلة رسالتو الرياضية”.
ثم عُرض فيديو حول نشاط الاتحاد نشاط الاتحاد لاقى اعجاب الحاضرين.
كيروز
بدوره القى كلمة رئيس الاتحاد اللبناني للتزلج والبياتلون فريدي كيروز كلمة جاء فيها:
أهلا” وسهلا” بكم بالحفل السنوي لتوزيع جوائز بطولة لبنان لموسم 2022-2023.
بال2021 بلشت كلمتي انو كانت سنة إستثنائية بسبب كورونا وتسكير محطات التزلج
وبال2022 قلنا انو كانت اكتر من إستثنائية بسبب الأزمة الإقتصادية يلي شملت كل القطاعات وبسبب كثافة كمية الثلوج خلال الموسم الفائت.
وبال 2023 مش عارف شو لازم نقول عن بلدنا يلي كلو إستثنائي بأزماتو بطقسوا بتفاصيلوا اليومية وحتى بالمشاكل الرياضية يلي عم بتدمر القطاع الرياضي.
مع كل هل المشاكل أخدنا قرار بالإتحاد مع زملائي بالهيئة الإدارية وبالتعاون مع رؤساء الأندية ومسؤولي محطات التزلج ومع مدرسة التزلج بالجيش اللبناني انو نبعد السياسة عن الرياضة ونوقف حد لاعبينا ونساهم بتطوير الألعاب الشتوية بكل المناطق الجبلية.
قدرنا بفترة قياسية ننظم كل روزنامتنا السنوية مع العلم انه موسم الثلج تأخر 40 يوم الموسم الفائت.
هيدا الشي ما خلانا ما نشارك بكل الإستحقاقات الخارجية ويلي كانت كتيرة وشملت كل الألعاب ( تزلج البي وتزلج عمق وسنوبورد وبياتلون).
قدرنا نشارك بالعديد من مخيمات التدريب بالخارج حتى نرفع مستوى لاعبينا وإستقدمنا مدربين لتزلج العمق وللبياتلون.
من بعد سنة من إنضمامنا للإتحاد الدولي للبياتلون قدرنا نستحصل على تمويل للعديد من برامج التدريب وتطوير البياتلون.
قدرنا ولأول مرة نصنف 4 لاعبين للمشاركة بالألعاب الأولمبية للناشئين يلي رح بتصير بكوريا الجنوبية ( 2 بالتزلج الألبي و2 بتزلج العمق).
قدرنا نبني علاقات دولية مع اهم إتحادات متطورة بالتزلج والبياتلون حتى نستفيد منها لصالح لاعبينا.
قدرنا إستدرينا مقعد ألإتحاد اللبناني للتزلج باللجنة الأولمبية اللبنانية ويلي سُرق منا على غفلة من قبل الفاسدين في القطاع الرياضي.
مشروعنا كبير لتطوير الرياضات الشتوية بلبنان وعنا رؤية للمستقبل وعنّا خريطة طريق لتطوير العابنا واضحة ومنتوافق عليون عليها مع إتحاداتنا الدولية.
هيدا المشروع مش رح منخلي حدا” يوقف بوجّوا لا من خلال إعادة الحياة للأندية الوهمية ولا من خلال الوساطات السياسية ولا من خلال العودة الى الوراء.
هيدا المشروع ما بيتعلق بوجودي كشخص بمركز رئاسة الإتحاد او بمركز الأمانة العامة هيدا المشروع هوثمرة عمل متفق عليها بالهيئة الإدارية الحالية مع الأندية الفعالة والقيّمين على محطات التزلج وعم نشتغل كفريق ومش رح منخليهم ياخدونا بالمفرق.
هلق خليني وجه رسالة للقيمين على الرياضة بلبنان. الأمور مش بخير وإذا كفيتوا تشتغلوا بهيدي الكيدية لبنان رح يتوقف دوليا” ورح يدفع الثمن لاعبينا لأنه ما بعود يحقلن يشاركوا بالبطولات الخارجية والألعاب الأولمبية. المؤسف انه في بعض المسؤولين الرياضين عم بحاولوا مع اللجنة الأولمبية الدولية يروحوا بهيدا الإتجاه وصارو معروفين. مفتكرين انه بيقدروا يرجعوا يفوتوا من الشبّاك ويرجع يسيطر فسادن على الرياضة
حرام يلي عم تعملوه و لانو مش رح ينفع الندم ورح يسجل التاريخ انه بعهدكم دمرت الرياضة بلبنان.
وأخيرا” بعد كل هيدا الشغل يلي عم ينعمل بمجهود من الأندية, والأهل و الاعبين ومن الإتحاد ما منقدر الا ما نفتخر بالإنجازات يلي حققوها اللاعبين وأنديتون يللي رفعوا اسم لبنان بالمحافل الخارجية واحرزوا الميداليات الملونة.
فيا ايها الأبطال، منقدر نوعدكم باسمي وباسم الهيئة الإدارية وباسم رؤساء الأندية انه رح نوضع كل امكانياتنا بتصرفكم لرفع اسم لبنان وتمثيل لبنان باحلى صورة.
والشكر الأخير لكل يللي عم بساهم بانجاح رياضة التزلج من عائلة اللعبة والقيّمين على محطات التزلج والاداريين والمدربين واللاعبين واللاعبات والأهالي والصليب الأحمر اللبناني والجيش اللبناني والشركات الراعية ورجال الصحافة والاعلام. والشكر الخاص لرئيس مجلس إدارة كازينو لبنان على إستضافتنا ودعمه للرياضة بلبنان.
ثم وزّعت الكؤوس والجوائز على الابطال والبطلات.
Comments are closed.