فيديو.. رانيا يوسف: بهدلوا بناتي ورجعوهم من المدرسة معيطين

[fvplayer id=”26″]

قالت الفنانة رانيا يوسف، إنها تعرضت لهجوم عنيف يوم السبت، بسبب الفستان الذى ارتدته فى ختام مهرجان القاهرة السينمائى، لكن الأمور بدأت فى الهدوء. ووجهت رانيا يوسف خلال لقائها فى برنامج «الحكاية»، الذى يقدمه الإعلامى عمرو أديب، والذى يعرض على فضائية «MBC مصر» رسالة إلى المحامين الذين تقدموا ببلاغات ضدها، قبل أن يتم سحبها، قالت فيها: «لو كنتم رفعتم السماعة وسألتونى كنت هقولكم حصل إيه بدون كل الدوشة دى، ودا شىء باين إنه مش مقصود، وباين إن أنا مش واخدة بالى وكان لازم إن حد ينبهنى ميسيبونيش كدا».

وأكدت رانيا يوسف أنها تلقت العديد من الرسائل على هاتفها، معلقة: «فيه رسايل لطيفة كتير جدا وفيه رسايل تخوف وتخض».

وعن بناتها قالت: «عرفوا الحكاية، وفيه ناس بهدلوهم فى المدرسة، وجاية بنتى متخانقة ومعيطة، وبتقولى يا ماما هيسجنوكى»، وأضافت: «الموضوع مع ولادى واخد مكان مش لطيف، هما كانوا مستغربين إنهم شافوا الفستان ومكانش كدا».

وتابعت: «قلت لبنتى متخافيش، إحنا ربنا معانا، وأنا معملتش حاجة غلط، إن شاء الله هتعدى على خير.. مفيش نية سيئة فى الموضوع، واللى بينى وبين الناس والعشرة اللى بينى وبين الجمهور يشوفوا إن أنا ست مش غاوية مشاكل، أنا ماشية جوة الحيط مش جنب الحيط، فأنا مقصدش أعمل كدا أبدا ودى حاجة كانت غصب عنى».

وعن توقعاتها لما يمكن أن يحدث قالت: «تم استدعائى من قبل مكتب النائب العام، ورايح معايا محامى من النقابة وهشوف إيه اللى هيحصل».