Home » لبنان » بول أبي راشد: شوهتوا اجمل المناطق الطبيعية بجنة وبقعاتا والمسيلحة وبلعا وبعدكن مكملين

رد الناشط البيئي بول أبي راشد عبر صفحته على “الفيسبوك” على رئيس التيار الوطني الحر جبران باسيل فكتب:

أستاذ #جبران_باسيل

انا واحد من يللي معارضين السدود اللي ذكرتن بمؤتمرك الصحافي اليوم وانا مني حزبي ولا بمثل اي فريق سياسي…

مش صحيح اننا عم نخترع قصص : حضرتك باشرت كوزير للطاقة والمياه بتدمير المواقع الطبيعية بجنة وبلعا والمسيلحة وبقعاتا بلا ما يكون معك موافقة من وزارة البيئة على دراسات تقييم الأثر البيئي والاجتماعي للسدود بحسب ما بيفرض قانون حماية البيئة ٢٠٠٢/٤٤٤

اما بالنسبة لسد بسري فكمان بلش قطع الأشجار وتشويه مرج بسري الأثري والزراعي والطبيعي بعد ما انتهت صلاحية دراسة تقييم الأثر البيئي عام ٢٠١٦
اما بالنسبة لتأمين المياه لمليون و٦٠٠ الف لبناني اليوم : فيك توضحلنا كيف ؟

سد بلعا بقضاء البترون صرلو 7 سنين شغل ليجمع مليون متر مكعب فقط من المياه وبعد ما خلص وزادت كلفته ٤ مرات ، قديش بدو وقت سد بسري ليجمع ١٢٥ مليون متر مكعب ؟ ٧ * ١٢٥ ؟ وبأي كلفة ؟
ليش ما خبرتنا انو مياه بسري رح تنخلط بمياه القرعون !ليش ما خبرت أهالي الشوف وجزين وصيدا وبيروت كيف رح تضمن سلامتن اذا تحركوا الفوالق الزلزالية اللي تحت البحيرة والسد ؟ ليش ما خبرتنا عن الحلول البديلة اللي طرحها المعهد الفدرالي الالماني لعلوم الارض والموارد الطبيعية اللي درس حل مستدام لتأمين مياه اضافية لبيروت الكبرى ؟
هل لان مرج بسري رح يأمنلكن صخور واتربة لردم البحر وخلق جزر سياحية ومشاريع اليسار ولينور ؟
ما بعتقد انو منظر سد المسيلحة بدو يشجع اهالي بسري لينتظروا شي ٢٠ او ٣٠ سنة ليخلص ويصير عندن درب مثل درب المسيلحة المشوه !
اليوم فيك تطلع ع بسري وتزور الدرب اللي مشاها السيد المسيح وتشوف آلاف الزوار من كل لبنان بمرج بسري …
للاسف شوهتوا اجمل المناطق الطبيعية بجنة وبقعاتا والمسيلحة وبلعا وبعدكن مكملين بالرغم من المخالفات القانونية وعدم الجدوى الاقتصادية !
هالشي منو تقدم هيدا هو النكد والخداع وهدر المال العام.

ناطرين من القضاء المستقل يطبق القانون ويحط حد لمشاريع السدود العشوائية اللي افرغت الخزينة وهدرت المال العام وشوهت طبيعة لبنان

إن إدارة موقع "سيدر نيوز" غير مسؤولة عن هذا الخبر نصاً ومضموناً، وهو لا يعبّر إلا عن وجهة نظر كاتبه أو مصدره.

Comments are closed.

Social Media Auto Publish Powered By : XYZScripts.com