Home » آراء, لبنان » وصل الشيخ بيار اهربوا.. و”فولز فاكن” الست جنفياف

نبيل يوسف*
من سنة 1997 وأنا بقصد المكتبة الشرقية ب الجامعة اليسوعية، وعلى طول تلفت نظري بناية مقابل الجامعة من 3 طوابق هيي من وقت ما بقصد الجامعة مهجورة بس واضح انها بناية عريقة كانت مهمة فيما مضى.


قرب الجامعة في دكان سمانة على طول بتوقف عندوا: صاحب الدكان عمروا أكتر من 80 سنة يعني عتيق كتير بالحي.


من كم يوم سألتوا عن البناية ويبدو تاريخها عريق ولي مهجورة؟
ضحك وقللي: هيدا بيت الشيخ بيار الجميل

  • مؤسس حزب الكتائب؟
  • صح تزوج وسكن بها البناية وبقي تا علقت الحرب تقريباً، كانت أهم بناية بالمنطقة هيي 3 طوابق تركوها المستأجرين من سنين ويمكن ورثة أصحابها مسافرين وصارت مهجورة ورح توقع.
    هيدي البناية طالع على درجها أهم شخصيات البلد، كل يللي كنا نشوفهم على التلفزيونات أنا شايفهم جايين عند الشيخ بيار ومسلّم على معظمهم: أهم زعما وشخصيات البلد وسفرا.
  • يعني أولاد الشيخ بيار عاشوا بالحي؟
  • ربيوا هون أنا بعرفهم أطفال كانوا كل يوم بالحي عايشين متلهم متل كل الناس ينزلوا يلعبوا قدام المحل وقتها كان في أكتر من محل ما بقا في غيري
    الشيخ بيار ما كان عندو لعب بها الأمور عيلتوا بدها تعيش متل كل العيل: كانت الست جنفيفاف تنزل هيي تشتري الخضرا من المحلات وأوقات يكون معها ام الشيخ بيار وقت تكون عندهم، وأنا شايف الرئيس أمين الجميل وكان ولد وشب بأول طلعتوا حامل أغراض ومطلعهم على البيت أوقات وحدوا وأوقات هوي وحدا من رفقاتوا. ويبقى الشيخ بشير ينزل يوقف ينطر بياع الخبز متل كل أولاد الحي: قديماً ما كان في ربطات خبز كان يمرق البياع كل يوم وتشتري منو الناس أرغفة بربع أو وبنص ليرة وقليل بليرة. وبنات الشيخ بيار على طول ينزلوا على المحلات يشتروا اغراض للبيت.
    كان مع الست جنفياف فولز فاكن 1300 كان في محل دواليب بالحي تضل ترقع بالدولاب تا يهتري: اذا ما بتعرفهم ما ممكن تقول هودي عيلة أهم زعيم بالبلد حياتهم ما كانت تفرق شي عن باقي عيل الحي ولا بشغلة.
  • كان الشيخ بيار عايش من دون حماية؟
  • هوي كان يخلي حدا يحرس البيت؟ يبقى معو فؤاد الشرتوني ودانيال الحشاش وبعدين اجا واحد أو 2 هودي هني ومش على طول متواجدين بالحي. بس قبل ما تعلق الحرب بفترة صغيرة وقت كبر الخطر الفلسطيني وكانوا يمرقوا بالحي بسياراتهم مسلحين وقتها بلشوا الشباب يتجمعوا وما كان الشيخ بيار راضي كتير أخدت فرقة الصخرة محل على زاوية الشارع وعملوا مركز ما كان بقا ينترك الشارع والشيخ بيار عايش فيه ما بيصير يعني كلنا بوقتها صرنا خايفين عليه الا هوي ما كان يعرف الخوف.
  • كان يصير مشاكل بالحي؟
  • أكيد هون بالحرب صارت خط تماس يعني البرج والبسطة فشخة، وعلى طول يجوا أولاد وشباب من تحت ويصير مشاكل مع أولاد الحي.
    سماع هالخبرية: في يوم تقريباً بأول الستينيات وصلوا على الحي أولاد من صوب البرج وعم يشتروا وفجأة علقوا هني وأولاد الحي وكلهم شباب ما بين 12 و 16 سنة ودار الخبيط ووصل الشيخ بشير واشترك بالمشكل وراح حدا صوب البرج جاب دعم يعني صار في شي 50 شب وولد ورح يمشي الدم عبث حاولنا كم شخص نروق الجو ما في مجال قام حدا اتصل بالفرقة 16 ووصلت الدورية وما كانوا يرتدوا عن بعض وطلبت الدورية دعم وصار في 3 جيبات والمشكل عم يزيد وما حدا فارقة معو الا الله ستر وطلت سيارة الشيخ بيار بأول الشارع أنا شفتها هوي سايق وحدوا الشرتوني وصرخ شب: وصل الشيخ بيار اهربوا.
    الله وكيلك بلحظة ما ضل في بالشارع الا نحنا كم رجال شي 5 والفرقة 16 أولاد الحي وعلى رأسهم بشير دغري هربوا وبس شافوهم أولاد البرج هربانين خافوا وهربوا.
    نزل الشيخ بيار: شو فيي؟ شو القصة؟
    خبرناه شو صار واجا رئيس الدورية شرحلوا الوضع.
  • له له ما بيجوز: بشير أكيد الو علاقة
  • لا يا شيخ: بشير وصل مأخر
  • ما تدافع عنو وينوا بشير؟ خليه يجي لهون: لو شو ما كانت الأسباب أولاد جايين على الحي ما بيعلقوا معهم.
    بعد ما طلع الشيخ بيار على البيت بقي جيب واحد من الفرقة 16 تا يتأكدوا كل شي تمام وقعدنا ضيفناهم قهوة قللي رئيس الدورية وهوي من منطقة بعلبك:
  • يا أخ شو هالسطوة عند الشيخ بيار؟ أنا أول مرة بشوفوا بحياتي كنت عم فكر اطلب بعد دعم كيف بس الناس سمعت باسموا بلحظة اختفوا؟.
    سألته: بعد ما تركوا الحي ضليت تشوف الشيخ بيار وعيلتوا؟
  • الشيخ بيار يمكن شفتوا كم مرة بس الشيخ بشير ضليت شوفوا كان يضل بالمنطقة، الشيخ أمين ترك الحي بكير يمكن قبل ما يتزوج بوقت قليل يعني من أول السبعينيات ما عدت شفتوا بس من شي 5 سنين كنت طالع من كنيسة مار يوسف وشفت موكب وقف ونزل من الجيب وطلع وجي بوجوا دغري عرفني بالاسم وغمرني وقللي: بعدك بالحي؟ كان الي شي 40 سنة وأكتر ما شفتوا.
    هذه قصة رواها لي شاهد عيان عن عائلة زعيم لبناني كانت تعيش حياتها كأي عائلة لبنانية عادية، ومؤكد أن جميع عائلات زعماء لبنان كانوا وقتها هكذا يعيشون: أين نحن اليوم من ذاك الزمن؟.
    *كاتب ومؤرخ
إن إدارة موقع "سيدر نيوز" غير مسؤولة عن هذا الخبر نصاً ومضموناً، وهو لا يعبّر إلا عن وجهة نظر كاتبه أو مصدره.

Comments are closed.

Social Media Auto Publish Powered By : XYZScripts.com
WhatsApp إحصل مجاناً على "أخبار الأرز" عبر واتس آب