“لمّا نصوّت لحدا يكون قراره بالبترون مش بالضّاحية”.. مجد حرب أطلق معكرته الانتخابية

أعلن المُرشّح عن المقعد الماروني في دائرة الشمال الثالثة المحامي مجد حرب إطلاق معكرته الانتخابية بإعلان ترشيحه الرسمي للانتخابات النيابية لعام ٢٠٢٢.

حرب وخلال إعلان البدء في المعركة قال:” بدنا نبلّش بأمل ببلد صار مارق عليه كتير، بشعب تدمّر ماضيه ومستقبله، بس بعدو مصرّ يرجع يبنيه، وبمشروع بيردّلنا لبنان يلّي منحلم فيه، عارفين قدّيش هالمهمّة صعبة بس أكيدين انّها مش مستحيلة،

يلّي بدّه استقلاله لازم يكون جاهز ياخده بايده
يلّي بدّه دولة قويّة لازم يكون جاهز يبنيها حجر حجر
يلّي بدّه يحاسب يلّي سرق ويلّي قتل بدّو يكون جاهز يواجه المجرمين
وعلى هذا الأساس بدّي قلكن إنّو نحنا جاهزين وبدّي إعلن ترشيحي عن المقعد الماروني بقضاء البترون.

منلاقي حالنا بهالقضاء على الخطوط الأمامية لإنقاذ كلّ لبنان.
لأن إبن السّاحل وإبن الوسط وإبن الجرد مسؤولين عن التّحرير وإستعادة الجمهوريّة، كلّ بيت وكلّ شخص بالبترون برقبتو في مصير البلد!

صوتنا مش صوت البترون بس، صوتنا صوت بيروت طرابلس صيدا زحلة وبعلبك والشّوف وجبيل وكسروان
صوتنا هو صوت الصّريخ يلّي سمعناه بالشّارع.

صوتنا صوت كل واحد بدّو يخلص من فاسد من خاضع من فاشل.

إجا وقت نكبّ كل يأسنا وغضبنا ووجعنا بهالصّندوقة.
رهانن إنّنا ما نصوّت وب15 أيّار نبقى ببيوتنا رهانن على إنّا نخاف إنن يشترونا بوظيفة أو ب100$
ورهانّنا على ضمير وكرامة وغضب أهلنا من رأس جرود تنورين لساحل البترون ومن شكّا لتحوم.
نحنا جاهزين نحرّر الجمهوريّة المخطوفة، تيرجع القرار للنّاس مش للسّلاح
تنحنا نقرّر بسّ بدنا حرب مش تنفرض علينا.
تيلّي بدّو يحكم ياخد رضا الشّعب مش رضا السّيد.
تلمّا نصوّت لحدا بالبترون يكون قراره بالبترون مش بالضّاحية.
وما حدا يقلنا عمل تفاهم وخضع كرمال السّلم الأهلي.
لأن السّلم الأهلي بالدّولة مش بالدّويلة

بالإقتصاد القوي مش بالتّهريب
بالكلمة الحرّة مش بكاتم الصّوت
بالجيش مش بالميليشيا
بالمؤسّسات مش بالصّفقات
السّلم الأهلي ما بيكون بتخزين المتفجّرات بين البيوت
السّلم الأهلي منّو لا بالحزب ولا بالتّيار، لأن ما بدنا جمهوريّة قويّة على المواطن يلّي بيحترم القانون.
قويّة عيلّي عم يعمّر حفّة وضعيفة عيلّي عم يخزّن نيترات.
قويّة عمزارع التّفاح وضعيفة على اللّي عم بهرّب الكبتاغون بالتّفاح.
جمهوريّة بتوقّف يلي عامل تغريدة وبتترك يلّي قتل ظابط بالجيش.
بدنا جمهوريّة مستقبل ولادها ببيروت لا بدبي ولا بسيدني

بدنا جمهوريّة ما تسرق تعبنا
بدنا جمهورية توقّف النزيف ب٣ أيّام وما تنام ٣ سنين
بدنا جمهوريّة ما يكون حاميها حراميها أو بيعيّنه حراميها
بدنا قضاء مستقل يقلّنا مين صرف 45 مليار على الكهربا وبعد ما في كهربا
مين فجّر مرفأ بيروت، إجا وقت الإصلاح الحقيقي ونحنا جاهزين
جاهزين نبني بلد فيه مجلس وزراء شغّال مش معطّل
جمهوريّة فيها مجلس نوّاب يراقب وسائل مش بشارك
جمهوريّة يلّي فيها بيقول بدو يقبع قاضي يجي قاضي يقبعله لسانه
نحنا جاهزين وعدّة قوانين لبناء الدّولة جاهزة، ونحنا جاهزين نراقب ونحاسب ونخبّر كلّ ناخب بكل صراحة وشفافية شو عم بيصير بهالدّولة.

صرنا جاهزين نقلب المشهد:
لأن الكسل ما بحياتو كان حلّ ونحنا حاكمتنا مجموعة كسلانين
النّاشط فيهن نشط كرمال جيبته. أو متل عنّا بعقاراتو، الإدارة الصّحيحة هيّ تخطيط بالاقتصاد والبيئة والتّربية وترسيم الحدود والنّفط ومش إدارة بس توقع المصيبة منشوف كيف منعالجها.
مش مسموح بال 2022 نتفاجأ بأوّل شتوي تنقطع الادارات من المازوت ومن الورق .
مش مقبول المواطن ينطر أشهر ابسط معاملة
مش مقبول هالمعاملة ما تمشي بلا برطيل.
بدنا جمهوريّة المتقاعد ما يشحد الإعاشة تياكل
المريض ما يبوس ١٠٠ ايد تا يلاقي مستشفى
والتّلميذ ما يعتل هم قسط جامعة عارف انو واسطة زعيم أهمّ من شهادتها
ما بدنا نعيش من تعب مغتربينا يلي كل يوم هالدّولة المحتلة عم تحططن راسن بالأرض، أهلنا يلّي ما بينشروا وما بيخافوا، إتّكالنا عليكن ساعدونا ندمّر هالمزرعة يلّي هجّرتكن ونبني لبنان يلّي بتحلموا إنتوا واولادكن ترجعوا عليه.
نحنا جاهزين لبعد 15 أيّار
مشروعنا اليوم مش حبر على ورق.
مشروعنا منّو شعارات
مشروعنا ما بيتغيّر كل أربع سنين، مع كلّ شخص مأمن بلبنان
مع يلّي أمن بلبنان السّيد الحرّ المستقلّ بلبنان النّظيف
مع يلّي ما ساوموا، مع رفاقنا بهالمعركة بحزب الكتائب.
مع يلّي بلّشوا النّضال السّيادي من أوّل لحظة، مع رفاقنا بحركة الإستقلال.

مشروعنا جاهز مشروعنا بدنا ننفّذه مع كل شخص أو فريق بيشبهنا تنبني لبنان يلّي كلنا منحلم فيه.
أهلي بالبترون ما عندي أي شكّ فيكن/ ما عندي أي شكّ بالانتصار.
لأن لبنان مش للإجار، ساعة لسوريا و ساعة لإيران
لبنان إلنا و نحنا بدنا نفرجيين إنّو لبنان إلنا، هنّي الولاية الإيرانية ونحنا لبنان الحرّية.
هنّي الصّفقات ونحنا قانون المناقصات
هنّي الوعود ونحنا الأفعال
هنّي الكلّ يوم موقف ونحنا كلّ يوم نفس الموقف
هنّي بيقولولنا ما خلّونا ونحنا من قلّن جاهزين”.